Sibrydion Snaks

Creu Gwir fel Gwydr o Ffwrnais Awen

2004-11-29T20:31:00.000Z

Fe fues i lawr yng Nghaerdydd y penwythnos diwethaf yma - dal bws am 7 o'r Orsaf yn Aberystwyth a dychwelyd am hanner nos Sul - yn canu'n agoriad Canolfan Mileniwm Cymru.

Mae na gryn dipyn wedi bod yn y cyfryngau am y bensaernïaeth a'r miliynau sydd wedi'u gwario ar y Ganolfan, ond yn bersonol, mae'n well gen i anghofio am y ffugenwau hurt a'r ffigyrau, a mwynhau'r adeilad ffantastig sydd ganddom ni fel cenedl.

Roeddwn i lawr yng Nghaerdydd fel aelod o Gôr Cymru ac yn canu comisiwn pwerus newydd gan Karl Jenkins, In These Stones Horizons Sing, bnawn dydd Gwener wrth i'r allwedd i'r Ganolfan gael ei basio i fyny o'r Bae at y drws ac yn y cyngerdd Gala Brenhinol nos Sul.

Dwi rioed wedi gweld cymaint o bobl enwog a thalentog mewn un lle, ac roedd na deimlad cryf iawn ein bod ni'n cymryd rhan mewn dathliad pwysig iawn, hanesyddol hyd yn oed, gefn llwyfan.

Roedd y mesurau diogelwch tu hwnt i'r hyn roedd ei angen - scanwyr bagiau a pyrth fel meysydd awyr, mwy o heddlu na sydd o siaradwyr Cymraeg yn yr holl fyd, pob ffôn symudol yn cael ei archwilio, cael eich gorfodi i yfed o unrhyw boteli dwr cyn mynd i mewn i'r Ganolfan, heddlu gyda drylliau ar ddrysau'r theatr, snipers ar ben y golofn ddwr, loriau wedi eu rhoi ar draws y ffyrdd, lluoedd o feiciau heddlu yn aros i fynd ar ôl unrhyw ddihirod, heddlu wedi eu gwisgo fel gwesteion gyda radios cuddedig yn eu gemwaith ayyyb. Rhyfeddol.

Perfformio ar y llwyfan nos Sul - hollol wych. Fe fydd y cof o'r llen yn codi gyda'r neuadd lawn o'm blaenau ac yna canu gyda'n holl angerdd. Roedd y symudiad olaf yn wych, a'r cymal olaf yn un yn wefreiddiol.

Penwythnos llawn a dwys, ond yn mynd i aros gyda mi am weddill fy mywyd heb os.

iTunes a fi

2004-11-29T20:19:00.000Z

Dwi wedi bod yn prynu cerddoriaeth oddi ar hwn ers y diwrnod cyntaf, ac wedi prynu rhai cannoedd o draciau erbyn hyn (y traciau diwethaf i mi eu prynu oedd Bryn Terfel yn canu Silent Noon, fersiwn byw U2 o Helter Skelter ac Ella Fitzgerald yn canu Cry Me a River). Mae'n gweithio'n wych a dwi'n prynu llawer mwy o gerddoriaeth ers i'r siop agor.

Fodd bynnag, newydd gael profiad rhyfedd iawn iawn.

Mae'n bosib prynu rhai traciau sy'n cynnwys fy llais i ar iTunes, oddi ar albym Katherine Jenkins, Second Nature. Fe recordiwyd y caneuon gan dim Katherine nol yn yr haf ar gwrs Côr Ieuenctid Cenedlaethol Cymru, ac er ei bod hi'n rhyfedd bod yn 14 yn y siart albymau ac yn rhif 1 yn y siart glasurol ers wythnosau, dim ond ar ôl gweld y caneuon ar iTunes dwi wedi sylweddoli pa mor rhyfedd ydy clywed eich llais chi ar recordiad o'r fath.

lluniau bach traed

2004-11-20T17:10:00.000Z

Dyma foblog arall Cymreig, sy'n cael ei gynnal gan rhywun sy'n agos iawn at fy nghalon. Ac yn agos at fy waled yn ystod y dyddiau diwethaf.

Lluniau bach diddorol ac yn rhoi cyfle i mi fod ychydig bach bach yn agosach ati er ein bod yn byw mor bell i ffwrdd.

(pen blwydd hapus :)

Y Trydydd Dydd ...

2004-11-14T21:12:00.000Z

Mae'r amser wedi dod i atgyfodi'r blog. Mae gen i ddigon o bethau diddorol i sôn amdanyn nhw a gan fod gen i rywfaint o amser rhydd (am unwaith), does na ddim esgusodion ar ôl - rhaid ailgydio'n y blogio!

Mae'r mis diwethaf 'ma wedi bod yn yr un o'r misoedd mwyaf prysur dwi erioed wedi cael, o bosib. Dyma ryw amlinelliad bras -

Mynd i'r theatr i weld 'Romeo a Juliet' (Theatr Genedlaethol Cymru) - siomedig iawn. Perfformiadau gwan a gorymdrechu ar yr ochr gynhyrchu. Gobeithio fydd pethau'n gwella'n fuan ar y cwmni.

Mynd i'r theatr i weld 'Lord of the Flies' (Pilot Theater Company) - cynhyrchiad diddorol iawn. Gwefan wych gan y cwmni ac fe fyddai'n edrych allan am deithiau gan y cwmni yma'n y dyfodol.

Gwrando ar Huw Meirion yn trafod ei gerddi a enillodd y Gadair yn yr Eisteddfod Genedlaethol eleni (ddwywaith) - wnes i fwynhau'n arw'r ddwy waith. Roedd hi'n arbennig o ddiddorol i weld safbwynt y bardd ei hun a chlywed am y broses ysgrifennu. Fe fydd mwy am hyn yn ymddangos ar Barddoniaeth Sibrydion yn fuan.

Chwarae'n Sinfonia'r Brifysgol - hyfryd cael chwarae mewn cerddorfa fechan, siambr am newid. Er ein bod wedi rhoi 7 awr o'n hamser i fynd i'r Drenewydd i gadw cyngerdd, roedd y gerddorfa'n fwy na'r gynulleidfa. Siomedig, ond lot o hwyl.

Canu yng nghôr Ger y Lli - côr aelwyd newydd yn Aberystwyth fydd yn dwyn dipyn o sylw'n y dyfodol agos, gobeithio. Rydyn ni'n cystadlu yn yr Wyl Gerdd Dant y Sadwrn nesaf yn Llandudno (wpdi - siwrne fws arall i fi) ar y côr alaw werin dwi'n meddwl. Gwyliwch y gofod.

Bod ar drip gyda chôr yr ysgol i'r Eidal - aros yn Rhufain a Sorrento. Hyfryd cael mynd yn ôl i Rufain (aros gyferbyn â gorsaf Termini, yr orsaf a anfarwolwyd gan Bryn Fô) a blasu ychydig o'r diwylliant, a hyfrydach oedd cael aros mewn lle mor brydferth â Vico Equense, ger Sorrento. Fe ges i fy nogn o hanes gydag ymweliadau â Herculaneum a Pompeii, fy siâr o ymarfer corff wrth gerdded i gopa Vesuvius, a diognedd o deithio mewn bws.

Gwrando ar NAR, Eryr a Rasputin yn y Cwps - gig a hanner! NAR yn wych ar Eryr yn rocio - gigiau naws y Gymdeithas yn datblygu traddodiad braf iawn. Edrych ymlaen at y nesaf yn barod (yn enwedig at Radio Lux).

Cael ymatebion gan Brifysgolion - wedi cael 5 ymateb allan o 6 erbyn hyn, a'r 5 yn eitha ffafriol. Dwi'n siwr o sôn mewn mwy o fanylder am y broses hon yn eitha buan, gan fod cyfweliadau, dyddiau agored a phenderfyniadau mawr ar droed.

Gwyl Gynganeddu Ty Newydd - penwythnos i'w gofio. Cwrdd â fy arwr, Gerallt Lloyd Owen, nos Wener a chael digon o hyder i ofyn am ei lofnod rhywsut - mae'r darn papur bach yna'n meddwl lot fawr iawn i mi. Gweithdy ardderchog gyda Karen Owen fore Sadwrn a noswaith hwyliog iawn gyda chynganeddu doniol 9 o feirdd a chanu a chyfeddach yn y Plu yn dilyn. Darlith tra ddiddorol gan Twm Morys y bore ma (a gan Huw Meirion am yr ail waith) cyn cael cinio anferth a gyrru adre'n flinder i gyd. Penwythnos i'w gofio.

Felly! Dyna sydd wedi bod yn mynd a 'mhryd i dros y mis diwethaf a gobeithio fod hwn yn rhyw fath o esboniad am y tawelwch llethol yn hytrach na'r sibrydion a ddylai fod yma. (Sori os di hwnna'n arbennig o ddiflas - fel rhyw fath o gatharsis ac yn braf i mi gofio 'nôl dros yr holl atgofion sydd gen i o'r mis diwethaf)

Gair o Eglurhâd ...

2004-11-11T16:52:00.000Z

Dydy'r blog hwn heb fynd yn angof - heb gael unrhyw amser ers dros fis i ysgrifennu yma - rhywbeth gen i bob nos!

Fe fyddai'n ailgydio yn y blogio cyn gynted â phosib, ond gan mod i mor brysur, Duw a wyr pryd fydd hynny.

Ymddiheuriadau lu, ond c'est la vie.

Macbeth

2004-10-09T12:42:00.000Z

Neithiwr, fe fues i'n ddigon lwcus i fynd i weld cynhyrchiad o Macbeth gan y cwmni Out of Joint. Dwi'n dweud digon lwcus oherwydd dyma'r cynhyrchiad gorau dwi erioed wedi gweld o unrhywbeth. Roedd y ddrama wedi'i osod mewn Rhyfel Cartref yng Ngorllewin Affrica ac yn arbrofol o safbwynt technegol, gyda'r llinell rhwng cynulleidfa ac actorion yn cael ei chroesi sawl gwaith.

Ar ddechrau'r ddrama, sef yr olygfa gyda'r dair gwrach, roeddem ni y tu allan i gefn Canolfan y Celfyddydau gyda'r actorion yn dawnsio o'n cwmpas ac yn pigo ffeit gyda rhai o'r gynulleidfa wrth i ni symud ac safle'r olygfa gyntaf. Ar ôl symud at y llwyfan, gyda'r gynulleidfa'n eistedd ar gymysgedd o gadeiriau a soffas yn agos iawn at yr actorion. Roedd yr actio'n wych - y cast i gyd yn groenddu ac o gefndir Nigeraidd neu Ghanaidd heblaw am Lady Macbeth a oedd yn ddynes wyn o Loegr.

Symudwyd y gynulleidfa i'r ystafell werdd y tu ôl i'r llwyfan ar gyfer yr olygfa o amgylch y bwrdd swper, gyda rhai aelodau o'r gynulleidfa yn eistedd o gwmpas y bwrdd, gan gymryd rhan yn y ddrama ei hun. Roedd digwyddiad mwyaf dramatig y cynhyrchiad yma hefyd, gydag ysbryd Banquo yn neidio trwy ganol y bwrdd.

Gan fod y ddrama wedi'i gosod yn Affrica, ac wedi'i roi mewn cyd-destun hollol gyfoes, roedd hi'n codi cwestiynau nad sy'n codi eu pennau wrth ddarllen drwy'r ddrama'n sych. Roedd uchafbwynt y cynhyrchiad yn ddynamig, egniol ac yn hollol ddramatig, gyda safbwyntiau Macbeth a Macduff yn cael eu amnewid yn gyflym a hynod effeithiol.

Heb os nac oni bai, hwn oedd y cynhyrchiad gorau dwi erioed wedi'i weld o unrhyw ddrama. Os y cewch chi'r cyfle i weld y cwmni, sef Out of Joint, yn y dyfodol agos, neidiwch ar y cyfle.

Os y bydd cynhyrchiad Cwmni Theatr Genedlaethol Cymru o Romeo a Juliet (dwi'n mynd i'w weld nos Sadwrn nesaf) chwarter mor dda a'r cynhyrchiad hwn, fe fydd eu perfformiad wedi gwella canwaith oddi ar Yn Debyg Iawn i Ti a Fi.

There'll be sausage rolls and welshcakes in the gazebo

2004-10-08T16:02:00.000Z

Fe fues i'n y Drwm neithiwr i fwynhau cwmni Huw Ceredig a Paul Durden, ac i wylio'r ffilm Twin Town. Do'n i ddim wedi gweld y ffilm o'r blaen - dim ond clipiau yma ac acw ar y teledu. Roedd hi'n wych, yn darlunio cymdeithas mewn ffordd real, doniol a chrafog.

Sgwrs Huw Ceredig a Paul Durden yn wirioneddol dda. Durden, awdur y sgript, yn amlwg yn foi coeth iawn oedd wedi ymollwng i mewn i greu'r ffilm, a Huw Ceredig yn ddoniol iawn gyda'i straeon o'r set.

Cododd un peth yn y sgwrs, sy'n frith ar draws y cofnod yn imdb sef y syniad mai Trainspotting Cymraeg ydi Twin Town. Mae hyn yn rybish llwyr wrth gwrs. Dwi o'r farn fod Twin Town, neu Pretty Shitty City fel y bwriadodd Durden, yn ffilm llawer cymhlethach na Trainspotting, ac yn sicr filgwaith yn fwy doniol.

Einige Haben Überleben ...

2004-10-02T10:05:00.000Z

Neithiwr, o dan oleuadau pinc y Neuadd Fawr ac o flaen cynulleidfa o blant bychain, fe ffrwydrodd Radio Luxembourg ar y sin.

Radio Luxembourg ydy'r ail fand i esblygu allan o Mozz (heddwch i'w llwch), ac mae eu cerddoriaeth ac agwedd ar y llwyfan yn debycach i stwff mwyaf craidd-caled Mozz na beth mae'r Stics (enw newydd y Poppies) yn ei gynnig.

Doedd amgylchiadau'r gig ddim yn wych - chwaraewr bas y grwp blaenorol (The Likely Lads) yn dweud helo chydig yn rhy bersonol wrth y drymiwr ac un o dannau'r gitarydd yn snapio o fewn deg eiliad i ddechrau chwarae - ond fe lwyddodd y band i ddelio gyda'r anawsterau. Mae'n rhaid rhoi sylw teilwng iawn yma i Kynan o Kenavo am gamu i'r adwy gan neidio ar y llwyfan a rapio i Mwngrels (dwi'n meddwl) tra bod Gerwyn yn neud rhywbeth am y gitar.

Roedd hi braidd yn siomedig i weld cyn lleied o gefnogaeth tu allan i ddisgyblion ysgol, ond roedd hynny'n ddisgwyliedig gan fod y gig 'naws' cyntaf gyda Mim Twm Llai, Alun Tan Lan a Fflur Dafydd yn chwarae'n y Cwps, a DJ Yoda yn chwarae fyny grisiau.

Reit, dyma be on i'n meddwl o'r bandiau:

Java - Da iawn. Fe weles i Java'n y Cwps yn eithaf diweddar, ac er bod eu swn yn eithaf amrwd a swnllyd, dwi'n meddwl bod y band ar eu gorau mewn stafell lai â'r gynulleidfa yn eu wynebau, fel petae. Roedden nhw'n gwella fel aeth y noson yn ei blaen a dwi'm yn gwbod beth ar y ddaear roedden nhw'n neud yn agor y noson.

The Likely Lads - Crap llwyr. Meddwl eu bod yn dod o Lundain ac yn ffrindiau gorau gyda golygydd NME, ond yn dod o Aberteifi a'n swnio fel tribute band i Oasis a'r Stone Roses. Chwaraewr gitar fas yn fronnoeth ac yn gwisgo menyg - tynnu sylw at ei hun ond edrych fel plentyn ofnus iawn yn canu cerdd dant yn y genedlaeth gan sefyll yn yr unfan drwy gydol y set. Yr unig beth da am eu perfformiad oedd eu prif ganwr - edrych yn dda, swnio'n dda a dewis ffantastig mewn sgidiau. Ond ar y cyfan, gwael iawn.

Radio Luxembourg - Gwych. Swn caled, unigryw. Perfformiad egniol iawn - Meilyr yn dda iawn fel ffrynt man ar ei ben ei hun a Dylan yn cael chydig o sylw (haeddiannol iawn!) o'r diwedd! Er yr holl drafferthion, set dda iawn ond braidd yn undonog i rywun nad sy'n hoffi eu swn sylfaenol. Edrych mlaen yn eiddgar iawn i glywed mwy gan Radio Lux.

Einige Haben Überleben ...

I am a Jedi, like my father before me ...

2004-09-30T16:25:00.000Z

Wedi derbyn tair ffilm wreiddiol Star Wars ar DVD fel anrheg pen blwydd - maen nhw'n wych!

Er mod i'n gwybod y rhan fwyaf o'r sgript ar fy nghof, wrth wylio'r fersiwn newydd, dwi'n cael gwefr newydd. Mae'r effeithiau'n ffantastig gan ystyried y cyfnod, a'r gwaith gyda 'minatures' yn dda iawn hefyd. Gwirioneddol ddiddorol ydi gwylio'r rhaglenni dogfen sydd ar y DVD ychwanegol, a gweld yr holl fanylder a meddwl caled sydd wedi mynd i mewn i'r gyfres.

Nes i ddim talu am y set, ond ma nhw'n sicr werth yr arian - y llun o safon uchel iawn, y rhaglenni dogfen yn wych ynghyd â gweld y newidiadau (sydd weithiau'n gynnil, a weithiau'n boenus o amlwg).

maes-e.com 10.08.2002 - ?

2004-09-26T13:10:00.000Z

Mae maes-e wedi diflannu am y tro.

Dim ond cydymdeimlad sydd gen i ar gyfer Nic, druan, sy'n gorfod ysgwyddo baich mil o aelodau (rhai yn fwy bodlon i wrando na'i gilydd). Mae'n siomedig fod lleiafrif mor fach yn medru achosi cymaint o ddiflastod. Diflastod i Nic yn gorfod poeni am faterion difrifol cyfreithiol, a diflastod i bawb sydd ar y maes am ormod lawer bob dydd, gan ein bod yn gorfod darganfod pethau eraill i'w gwneud.

Brysia wella maes-e, a pwy bynnag achosodd hyn (dwi'm yn gwbod - ddim yn dilyn pa bynnag edefyn sy'n cael y bai) - stopiwch plis, neu fyddai'n gorfod gwneud pethau tu allan i'r gilfach hon.

Lysh

2004-09-22T15:51:00.000Z

Mae'n ymddangos mai'r unig bethau sy'n cael eu blogio yma ydi tripiau i'r sinema a'r theatr, ac yn parhau yn y traddodiad hwnnw, dwi am son am y ddrama 'Lysh' o waith y Prifardd a'r archddramodydd Aled Jones Williams.

Drama lled-hunangofiannol ydi Lysh, gyda rhai cymeriadau'n adleisio'r awdur yn eithaf amlwg. Roedd yr actio'n dda ar y cyfan, er mod i'n teimlo fod rhai actorion yn gryfach na'i gilydd. Gan fod y ddrama mor ddwys, llawn tyndra ac yn bersonol iawn, roedd hi braidd yn annifyr eistedd yn yr ail res, ond dyna ni. O safbwynt technegol, roedd hi'n ddrama eithaf prysur, gyda delweddau yn cael eu taflunio ar gefn y set am y rhan fwyaf o'r ddrama, a llawer o gerddoriaeth yn cael ei daflu i mewn hwnt ac yma.

Er fy mod i'n gweld y ddrama fel llwyddiant yn gyffredinol, ac er fod y ddrama'n bersonol iawn, doedd y cymeriadau ddim yn gredadwy iawn ar adegau, yn enwedig eu ffordd o siarad. Doedd y geiriau ddim yn swnio fel petaen yn real, ac yn tynnu oddi ar yr effaith ryw chydig. Aneffeithiol hefyd oedd cael cymaint o gyfeiriadau at gerddorion a cherddoriaeth, a llethol oedd yr holl gymariaethau 'modern, bachog'. Roedd ambell i berl yn y ddrama, ond oherwydd y gorwneud difrifol, roedd yr effaith wedi'i ddyfrio'n sylweddol.

Wedi dweud hyn oll, nes i fwynhau gwylio'r ddrama. Yn fy marn pitw i, doedd y cynhyrchiad ddim cystal â 'Yn Debyg i Ti a Fi' na'r ysgrifennu mor dda â 'Ta-ra Teresa', ond mae'n haeddu tua 7 neu 7.5 allan o 10.

Dodgeball

2004-09-17T21:35:00.000Z

Newydd fod yn gweld y ffilm Dodgeball gyda Ben Stiller a Vince Vaughn yn serenu. Dwi'n ffan mawr o Ben Stiller, yn enwedig Zoolander, felly roedd Dodgeball yn plesio'n fawr iawn.

Mae'r stori'n ddigon syml - grwp o alltudion cymdeithas yn ymdrechu (a llwyddo wrth gwrs) i ennill cystadleuaeth dodgeball yr ADAA (American Dodgeball Association of America) yn Las Vegas, gan ennill $50,000 o bunnoedd ac achub eu gym. Os nad ydych chi'n hoffi'r math o hiwmor sydd mewn ffilmiau fel Zoolander a'r Royal Tenenbaums, wnewch chi ddim mwynhau hon, ond i'r rhan sy'n ymfalchio yn y math hwn o synnwyr digrifwch, fe fyddwch chi'n mwynhau'r ffilm hon mas draw.

Pan yn gwylio'r ffilm, mae'n amlwg fod na fwy i'r ffilm na dim ond yr hiwmor amlwg yma, e.e enw'r cymeriad sy'n gweld ei hun fel dyn perffaith ayyb yw White Goodman. Mae na sawl cameo yn y ffilm hefyd - David Hasselhoff, William Shatner, Hank Azaria a Chuck Norris - ond cameo Lance Armstrong sy'n sefyll allan - plis sticia at y reidio beic. Roedd na sawl cyffyrddiad da arall yn y ffilm, fel y sylwebwyr chwaraeon stereotypical, a pherfformiad Rip Torn fel yr hyfforddwr hollol wallgo Patches O'Houlihan.

Hon yw'r gomedi orau i mi weld ers amser - ffilm ardderchog sy'n haeddu 8.5 / 10.

Ac arhoswch tan reit ar ddiwedd y credits - yn sicr werth aros.

2 - 2

2004-09-09T16:21:00.000Z

Fe fues i lawr yng Nghaerdydd neithiwr yn gwylio Cymru vs Gogledd Iwerddon.
Gem dda i'w gwylio, ond doedd hi ddim yn gem dda i fod yn gefnogwr Cymru.

Yn dactegol, dy ni ddim digon cryf. Dim digon o beli da mewn i'r cwrt cosbi, seilio'r tim o amgylch John Hartson sydd ddim wedi edrych yn beryglus ers hydoedd, chwarae heb ddigon o awch o flaen y llinell 18, camddealltwriaethau'n y cefn, marcio gwael (a arweiniodd at gol gyntaf Gog. Iwerddon) ac yn y blaen - allen i fynd mlaen am oriau.

Rodd cefnogwyr Gogledd Iwerddon yn edrych yn arbennig o falch o'u Prydeindod ac roedd cryn dipyn o dwrw pan gyhoeddwyd clwb John Hartson, sef Celtic. Ar y llaw arall, da oedd gweld cymaint o falchder mewn bod yn Gymry. Roedd na sawl mewnfudwr cenhedlaeth gyntaf / ail genhedlaeth yn cefnogi'r tim yn arbennig o ffyrnig yn eitha agos i mi'n y stadiwm.

Nes i'm clywed gair o God Save the Queen felly dwi'n edrych ymlaen yn eiddgar i weld yr ymateb yn gem Lloegr.

Sibrydion o fath arall eto

2004-09-04T12:42:00.000Z

Es i i'r theatr neithiwr i weld Theatr Cenedlaethol Ieuenctid Cymru'n perfformio Sibrydion / Whispers in the Woods. Do'n i ddim yn siwr iawn beth i'w ddisgwyl o ran safon y cynhyrchiad, cynnwys y ddrama ayyb, ond fe ges i'n siomi ar yr ochr orau.

Hanesion tylwyth teg (rhyw drosiad clyfar o fywyd bob dydd mwy na thebyg - rhy flinedig i sylwi) lliwgar wedi'u hadrodd yn ardderchog oedd yma. Ro'n i'n nabod ychydig o'r cast a wedi gweld y gweddill yn y Cwps yn gig Poppies, felly roedd hi'n diddorol gweld sut roedd yr actorion wedi rhoi eu hosgo personol i mewn i'r cymeriadau.

Roedd y sioe yn gwbwl ddwy-ieithog gyda rhai aelodau o'r cast yn canu'n Gymraeg tra bod eraill yn canu'n Saesneg a rhai sgyrsiau'n Gymraeg ar un ochr a Saesneg yr ochr arall. Gan fod y siaradwyr Cymraeg yn y cast yn y lleiafrif, roedd hi'n galonogol iawn clywed cymaint o Gymraeg yn y ddrama, gan fod fy mhrofiad i o gyrsiau a pherfformiadau o dan CCIC (Celfyddydau Cenedlaethol Ieuenctid Cymru) yn hollol Saesneg a Seisnig.

Fel perfformiad, buaswn i'n rhoi marc go uchel i'r cynhyrchiad, gan fod y ddrama yn gwbl llyfn a'r actio'n rhagorol. Yn anffodus, efallai nes i ddim mwynhau cymaint â phosib oherwydd fy mod i'n go sal (gormod o haul, dim digon o ddiod, blinder ayyb), ond ar y cyfan, noson dda iawn.

Ffwcio dy tsh, Smocio dy ah.

2004-08-30T18:03:00.000Z

Druan.
Dwi'n hoffi straeon fel hyn, ond yn rhy aml o lawer maen nhw'n cael eu anwybyddu gan raglenni newyddion "o safon" a'u gadael i Newsround a Ffeil.
Dwi'n meddwl y dylai gwasanaethau newyddion stopio bod mor obsesd efo cael newyddion at y bobl yn gyflym, a chanolbwyntio mwy ar straeon "and finally ..." a cael lluniau o fwnciod yn smocio.

Blog Cymraeg arall

2004-08-30T16:13:00.000Z

Wele, blog Cymraeg arall.
Dwi'n falch iawn mod i'r rhan o'r adfywiad cyffredinol mewn blogiau Cymraeg sy'n digwydd ar y foment. Dim ond canlyniadau positif y gallai weld i'r madarchu diweddar yma, a rhaid dweud fod darllen trwy flogiau pobl eraill dwi'n eu rhithadnabod yn ddiddorol iawn. Dwi'n teimlo mod i'n dod i adnabod y bobl yma'n well, ac yn dod i ddeall efallai fod rhai oedd yn ymddangos ychydig yn dawelach ar maes-e yr un mor diddorol â'r ffanatig nesaf.

Undertaker's Paradise

2004-08-27T21:40:00.000Z

Wedi bod yn y Drwm yn y Llyfrgell Genedlaethol am yr ail noson yn olynol, a wedi bod yn gweld y ffilm 'Undertaker's Paradise' heno. Mae'r ffilm wedi'i saethu gan gwmni Almaenig (mae na fersiwn wedi'i ddybio'n Almaeneg ar gael gyda llaw) yn Aberystwyth, ac yn defnyddio cyfuniad diddorol o actorion proffesiynol o'r byd Saesneg, Almaeneg ac Americanaidd, actorion adnabyddus sy'n Gymry a phobl lleol.

Mae'r ffilm yn adrodd stori Hugo Nagel (Thomas Schmauser) - ymgymerwr sy'n dechrau ei fusnes ei hun yma'n Aberystwyth, a cherddor o America (Ben Gazzara o'r Big Lebowski a'r Thomas Crown Affair) sy'n "rhoi cymorth" iddo i gyrraedd y nod. Yn ôl y ffilm, mae'r ganran uchaf o bensiynwyr yn Ewrop yn byw yn Aberystwyth, felly'n le perffaith i fusnes ymgymerwr. Mae'r ffilm yn amlwg yn son yn go helaeth am farwolaeth, felly ro'n i'n poeni tamed bach pan yn asesu'r gynulleidfa, gan fod canran uchel o'r gynulleidfa yn byw eu chweched degawd neu fwy. Doedd dim angen i mi boeni, fodd bynnag, gan fod y pensiynwyr eu hunain wedi bod yn actio cyrff meirw yn y ffilm!

Dwi'n meddwl fod y ffilm yn haeddu tua 7 a hanner allan o 10, ond gan fod y profiad o weld y ffilm wedi'i gyfoethogi gan fyw yn Aberystwyth, dwi'n rhoi 8. Mewn brawddeg, marwolaeth a lot ohonno, mewn comedi ddu pur lwyddiannus.
Ond yn anffodus, does dim dosbarthwr Prydeinig gan y ffilm, felly mae'n anhebygol iawn y bydd y ffilm yn cael ei weld gan lawer o bobl, gan gynnwys y trigolion lleol a fu'n serennu ynddi, sydd braidd yn drist.

Athrylith

2004-08-26T22:15:00.000Z

Fe fues i'n y Drwm heno'n y Llyfrgell Genedlaethol yn gwrando ar Niall Griffiths yn siarad am ei waith. Rodd Iwcs o enwogrwydd Iwcs a Doyle yn darllen ychydig o'i waith, darlleniadau da iawn hefyd. Dwi heb ddarllen 'run o'i lyfrau, ond dwi wedi cael blas arnyn nhw ar ôl heno.

Er ei fod yn amlwg wedi bod yn yfed am gyfnod estynedig cyn y sesiwn (ac yn parhau i yfed yn ystod y sesiwn ei hun), roedd o'n amlwg fod y dyn yn arbennigo huawdl ac yn llwyddo i fynegi ei hun yn wych. Er fod ei lyfrau yn ymddangos yn ddiriaethol iawn, gyda alcohol a chyffuriau yn themâu amlwg, roedd hi'n amlwg bod llawer mwy i'r dyn nac adrodd straeon am fedd-dod ac yn feddyliwr dwfn iawn.

Dyma rywfaint o ddolenni am yr awdur, sydd wedi sgwennu Kelly & Victor, Grits (wedi'i gyfieithu i 10 iaith), Sheepshagger a Stump.

Cyfweliad diddorol am ei hanes a'i waith
Dyma beth sydd ganddo i ddweud am lyfrau y flwyddyn 2003 sy'n dangos ei steil i raddau
Proffeil y BBC

Sibrydion o fath arall

2004-08-26T16:03:00.000Z

Dwi'n edrych ymlaen yn eiddgar i fynd i weld Theatr Cenedlaethol Ieuenctid Cymru'n perfformio 'Sibrydion' (Whispers in the Woods) yma'n Aberystwyth tuag at ddiwedd wythnos nesaf. Wnes i ddim archebu tocyn yn ddigon buan y llynedd, ond ma'n ffrind i wedi cael tocynnau eisoes (dwi'n gobeithio) felly barod i fynd y tro yma.

Wnes i glywed pethau da iawn am y cynhyrchiad y llynedd, a mae'r erthygl yn y Cambrian News wedi nhemptio i'n barod. Dwi'n meddwl mae'r peth diwethaf i mi weld yn y theatr oedd Ta-ra Teresa gan Aled Jones Williams oedd yn hollol wych, felly dwi'n falch iawn i weld fod y ddrama gomisiwn yn y Steddfod leni, Lysh, hefyd yn dod i Aberystwyth ymhen hir a hwyr. Wedi i mi feddwl chydig mwy, newydd sylweddoli mai Yn Debyg Iawn i Ti a Fi oedd y peth diwethaf i mi ei weld yn y theatr, a roedd hwnnw'n arbennig o dda hefyd. Bywyd theatrig Cymreig yn edrych yn go iachusol ar y foment.

Tarantino

2004-08-23T22:04:00.000Z

Newydd ddod ar draws hwn - http://qtdiary.blogspot.com
Os mai gwir flog Tarantino ydy hwn, wel wahey. Beth am gael rhywun o griw Pobl y Cwm i greu blog cyfatebol yn Gymraeg?
Os mai rhyw foi'n cael hwyl ydy hwn, wel chwarae teg, mae'n gwneud gwaith da.
Dwi'n wirioneddol hoff o'i waith, a'r ma'r newyddion yn y blog yn swnio'n addawol iawn.

Maes y Gad

2004-08-20T21:43:00.000Z

Tudalen rhaglen 'Battlefield Britain' y BBC

Newydd fod yn gwylio rhaglen hynod ddiddorol am ymgyrch Owain Glyn-dŵr yn erbyn y Saeson ar BBC2. Mor falch i weld rhaglen hanes o'r safon yma ar y teledu. Er fod y cyfweliadau gyda'r 'milwyr' braidd yn sili ac efo 'dumbing-down' wedi sgwennu drostyn nhw'i gyd a bod na un dramateiddiad yn ormod o faes y gad yn y rhaglen, roedd y wybodaeth yn cael ei gyflwyno'n gytbwys a diddorol.

Doeddwn i ddim yn deall fod Glyn-dŵr yn rheoli byddin gyda cymaint o sgil a chlyfrwch, gan falu'r Saeson yn Pilleth gan ddefnyddio tactegau guerilla clasurol. Gan mod i'n diddori mewn hanes yn gyffredinol (ond nid hanes Cymru), roedd hi'n eitha neis gwylio rhaglen o'r safon yma am Gymru. Sneb cweit yn cynhyrchu rhaglenni teledu fel y BBC, felly roedd cael rhaglen chydig yn llai 'trashy' na rhaglenni'r History Channel ac UKHistory'n newid da hefyd.

Roedd y rhaglen hefyd yn codi'r cwestiynau hanesyddol arferol - beth fyddai wedi digwydd os byddai hyn neu'r llall wedi digwydd, e.e pen Hotspur ddim yn yr union fan honno pan aeth saeth drwy'i ben, Glyn-dŵr wedi mentro yng Nghaerwrangon ayyb. Ond c'est la vie - allwn ni ddim newid dim byd yn y gorffennol wrth gwrs, dim ond symud syth ymlaen (chwedl selebs cariad@iaith). Dwi wedi ychwanegu cerdd sy'n son am y frwydr, o eiddo Vernon Jones, drws nesaf yn Barddoniaeth Sibrydion. Mwynhewch.

Dylai'r jibar wedi ymosod arnyn nhw yng Nghaerwrangon! Bydden i'n Dywysog Krusty erbyn hyn.
Mae gwefan y rhaglen yn cynnwys cwpwl o erthyglau am hanes Cymru ar hyn o bryd, gyda llaw.

Blogiau ym mhobman

2004-08-20T19:29:00.000Z

Mae hi'n ymddangos fel bod galwad Nic am fwy o flogiau Cymraeg eu hiaith wedi dwyn ffrwyth (teimla'r pwer nic, teimla'r pwer), gyda fy mlog i blog Gwahanglwyf Dros Grist blog Sleepflower gwefan mp3au Nic (fy mhrofiad cyntaf o Datblygu! diolch!) Loopy Loo Loo blog y Pyndit a blog eusebio.

Chwyldro ar droed bobl!

Cilmeri II

2004-08-17T16:08:00.000Z

Newydd roi dau ran arall o awdl fuddugol 1982 drws nesaf. Dwi ddim yn mynd i roi'r cyfan yno, dim ond fy hoff ddarnau.
Yn yr ail ran, dwi'n arbennig o hoff o "Ac ail-fyw ei glywfau o / Â galar h^yn nag wylo.", ond fy hoff linell ydy "Wybren y bore'n aberoedd o waed" gan ei bod yn llinell mor fyw.

Dwi wedi bod yn hoff o'r chweched rhan o'r awdl ers i mi weld "Dal:Yma/Nawr" rhai misoedd yn ôl. Roedd clywed y bardd ei hun yn adrodd y darn hwn yn ei gyfanrwydd yn wych. Nath yr erchylltra a'r braw o'r ddeunaw yn erbyn y cannoedd fy nharo i'n galed iawn. Roedd honno'n "foment" - pan dy'ch chi'n clywed neu gweld rhywbeth, a ry'ch chi'n gwbod fyddwch chi byth yn gweld na chlywed y peth hwnnw'r un ffordd eto. Digwyddodd hyn dair gwaith i mi'n ystod Dal:Yma/Nawr - clywed Gerallt LlOwen yn adrodd y darn hwn, clywed John Cale yn canu Ar Lan y Môr a teimlo'r golled go iawn yn y gân am y tro cyntaf erioed, a reit ar derfyn y ffilm wrth glywed TH Parry-Williams yn adrodd ei soned, Dychwelyd.

Oman TV neu S4C?

2004-08-17T14:57:00.000Z

Ydi hi'n rhyfedd ein bod ni'r Cymry yn ymfalchïo bod ein rhaglenni teledu'n cael eu darlledu o shediau mewn ffermydd?
Dyna be dwi'n ei feddwl bob tro dwi'n gwylio'r Noson Lawen, neu'n gwylio Hwyl y Noson Lawen (yr "highlights show") fel roeddwn i'n gwneud y noson o'r blaen. Roeddwn i'n digwydd bod yn fyr fy amynedd pan ro'n i'n gwylio'r standups (i gyd yn ddynion) yn mynd trwy eu setiau hiwmor toiled / hen bobl yn cael rhyw, felly dyma fi'n newid y sianel. Dwi'n ddigon lwcus i gael lloeren anferth ar ochr y ty, sy'n fy ngalluogi i wylio teledu gwledydd tramor, a dyma fi'n penderfynu fflicio drwy sianeli'r gwledydd hyn.

Wrth ddechrau mynd trwy'r gwledydd mwy "datblygedig" (hynny yw sianeli teledu sydd â rhywfaint o arian) roedd na gymysgedd o raglenni tebyg i'r hyn y byddech yn ei ddisgwyl ar y BBC neu ITV - rhaglenni drama, sioeau teulu ayyb.

Wedyn dyma fi'n gadael sianeli yr Eidal, yr Almaen a Ffrainc, a chyrraedd y rhai sydd ychydig yn fwy amaturaidd eu naws. Gan amlaf, sianeli yr hen Undeb Sofietaidd a'r rhai Arabaidd sydd fwyaf diddorol a hynny oherwydd eu bod yn hawdd i chwerthin arnyn nhw.

Dyma pryd nes i sylweddoli pa mor hawdd ydy hi i gachu ar ddiwylliannau (a sianeli teledu) gwledydd eraill heb feddwl y sgil-effeithiau negyddol. Dwi'n gwbod nad ydy hyn yn wyddor niwclear, ond weithiau wrth rantio yn erbyn pobl "gwrth-Gymreig" mae rhywun yn anghofio pa mor hawdd ydy hi i ddiystyru diwylliannau eraill. Dwi'n gobeithio y byddai'n llai parod i golli nhymer efo rhyw wannabe Janet Street Porter y tro nesaf ma nhw'n pw-pwio rhywbeth Cymreig yn ddifeddwl.

Melys a'r Chwerw

2004-08-15T20:58:00.000Z

Dwi'n wirioneddol hoff o'n chwaraeon, felly mae hi wedi bod yn benwythnos da i gefnogwyr o'i gadair fel fi. Ddim yn gwbl lwyddiannus - Nicole Cooke yn dod yn bumed siomedig a Kelly Morgan yn colli'n y badminton. Ond digon i'w ddathlu - buddugoliaethau i Chelsea, Aber a Schumacher.

Dwi wedi bod yn dilyn y blog diddorol iawn Scott Goldblatt ers ychydig, ac mae'n wirioneddol ddiddorol - yr ochr bersonol honno o ganol y pentref Olympaidd sy'n cael ei cholli yng nghanol sbloets botwm coch y BBC a'r darllediadau diderfyn.

Dyma'r blog.

A pam does na ddim cleddyfa arno?! Gymnasteg bob awr o'r dydd a rasus beiciau am oriau, ond lle mae'r un peth dwi am ei weld? grr

Barddoniaeth Sibrydion

2004-08-15T20:26:00.000Z

Gan obeithio nad ydw i'n torri gormod o reolau hawlfraint, nac yn piso rhywun i ffwrdd, dwi wedi dechrau gwefan arall i roi'r darnau y byddaf yn eu crybwyll fan hyn mewn ychydig bach mwy o gyd-destun. Efallai fydd y apFlog yma'n cynnwys rhai darnau ychwanegol, e.e rhywbeth tebyg i fformat Englyn y Dydd sy'n rhan o morfablog.

Dolen i'r wefan newydd

Cilmeri

2004-08-14T18:48:00.000Z

Wedi i mi feddwl am be sgrifennais i neithiwr ynghylch Cymry'n dilyn Jac yr Undeb ac edrych ar y Cyfansoddiadau ro'n i wedi'u dethol, doedd dim amheuaeth ar pa flwyddyn y byddwn i'n dechrau darllen.
1982.

Felly dechreuais ymrafael ag awdl Gerallt neithiwr. Mae hi'n dipyn o awdl - yr orau i mi ei darllen erioed yn sicr. Dwi wedi penderfynu tynnu'r awdl yn ddarnau a sôn am ddarnau ohoni yma.

O'r pum pennill sy'n y rhan gyntaf, dwi'n methu'n deg a phenderfynu os mai

Hyd eithaf y ffurfafen
Y teimlaf ei anaf hen
A'i wae ym mhob gwythïen.

neu

Er bod bysedd y beddau
Yn deilwriaid doluriau,
Cnawd y co' nid yw'n cau.

yw fy hoff bennill. Dwi'n arbennig o hoff o 'Er bod bysedd y beddau'. Mae gen i fan gwan ar gyfer personoli da a mae hwn yn taro deuddeg. Fe fydd gweddill yr awdl yn dilyn ...

Gadewch i'r Gemau Ddechrau

2004-08-13T21:39:00.000Z

Newydd wylio Seremoni Agoriadol y Gemau Olympaidd yn ei gyfanrwydd. Teimlo fel mod i'n cael "nation fatigue" wrth weld yr holl wledydd yn pasio. Mae rhywbeth fel hyn yn gwneud i chi sylweddoli pa mor fach ydy Ewrop, a pa mor fach ac unigryw ydy Cymru.

Roedd hi braidd yn drist gweld yr holl wledydd bychain wedi dod yn rhydd o grafangau'r Ymerodraeth ac yn falch o'u cenedl, a wedyn gweld Cymry'n gorfod dilyn Jac yr Undeb.

Yn ystod y seremoni (i atal fy ymenydd rhag sychu'n grimp) nes i hidlo trwy'r degawdau o gyfansoddiadau oedd yn yr atig. Dwi wedi dewis rhyw griw dethol o awdlau i'w darllen, felly cewch chi glywed mwy am hynny rhyw dro arall.

Beth bynnag, y Gemau eraill sy'n dechrau fory ydy'r tymor pêl-droed go iawn. Ddim rhyw gynghrair ceiniog-a-dimau-can-coca-cola, ond y bois mawr.
Mae'r tymor yma'n argoeli i fod yn dymor rhwystredig iawn ar yr un llaw, ond llwyddiannus (gobeithio) ar y llaw arall. Yn y llaw gyntaf mae'r chwalfa a elwir yn Aber Town ac yn y llaw arall mae'r utopia a elwir yn Chelsea.
Reit, dwi'n mynd i daclo'r html sili yma ... ...

Un Cam Bychan

2004-08-12T18:49:00.000Z

Noswaith dda.
Dwi ddim cweit yn siwr be dwi'n ei wneud, ond dwi'n gwbod mod i'n gwneud rhywbeth.
Wedi penderfynu gwneud rhywbeth. Pwy a wyr am ba hyd fydd hyn yn para, ond fe wnai roi cynnig ar y busnes ma beth bynnag.

Felly, noswaith dda rithfro.